Dásseárvoáššeolmmoš

Dásseárvoáššeolmmoš bearráigeahččá nissoniid ja albmáid gaskasaš dásseárvvus addojuvvon lága čuovvuma. Áššeolmmoš addá rávvagiid ja neavvagiid dásseárvoláhkii gullevaš gažaldagain, nugo sohkabeallái, sohkabealleidentitehtii dahje sohkabeali albmabuktimii vuođđuduvvi vealahusas. Maiddái olggušteapmi áhpehisvuođa ja bearašluomuid vuođul lea sohkabeallái vuođđuduvvi vealahus. Dásseárvoáššeolbmos oaččut maiddái neavvagiid dásseárvvu ovddideamis ee. bargosajiin ja oahppalágádusain.

Dásseárvoáššeolmmoš lea iehčanas ja sorjjasmeahttun lágagohcinvirgeoapmahaš ja doaibmá vuoigatvuođaministeriija hálddahussuorggis.

Dálá dásseárvoáššeolmmoš lea Pirkko Mäkinen.

Dásseárvoáššeolmmoš bearráigeahččá dásseárvolága ja gieđahallá dušše dasa laktáseaddji, sohkabeliid dásseárvui guoskevaš áššiid.

Eahpidatgo vealahusa?

  • Dásseárvoáššeolbmos oaččut rávvagiid ja neavvagiid, juos eahpidat, ahte leat šaddan vealahuvvot. Dásseárvoáššeolbmo rávvagat leat nuvttá.
     
  • Bargoeallima vealahandiliin:
    Juos gulat ámmátlihttui, de váldde oktavuođa luohttámušolbmui ja čielggat vuoigatvuođaidat. Ámmátlihtuid lahttomáksu sisdoallá vuoigatvuođa juridihkalaš rávvemii.
  • Sáhtát váldit oktavuođa maiddái almmolaš riekteveahkkái, láhkaáššiiddoaimmahahkii dahje ášševuoddjái. Láhkabálvalusat leat dábálaččat mávssuvuložat. Dárkkis, leago dus dakkár riektedorvodáhkádus, mii gokčá diggegoluid.

    Ruđaheapmin sáhtát leat vuoigadahtton almmolaš riekteveahkeaheaddji mávssuhis dahje muhtin muddui mávssuvuloš riekteveahkkái.